Middelburg

Uut Wikipedia
Hi nae: navigaotie, zoeken
Locaosie van Middelburg in Zeêland
Vomaeleg Staduus an de Mart
De gebombardeerde stad in 1940
De Lange Jan

Middelburg is de oôdstad van de provincie Zeêland. 't Leit op Walchren. Nae Terneuzen is 't de tweêde gemeênte naer antal inweuners: 47.822 per 1 januari 2012. De gemeênte omvat nessens de stad Middelburg ok nog de durpen Erremu, Kleverskerke, Sint-Lauwers en Nieuwland en de buurschappen 't Ouwe Durp en Perdamme. Middelburg is de oudste stad van de Zeêuwse eilanden en oort op Walchere dikkels angegeve mee Stad. De bienaem van de Middelburgers is Maeneblussers.

Functies[bewerk | brontekst bewerken]

Zoôas bove gezeid is Middelburg oôdstad van Zeêland, daermeê 't 'n administratief centrum is. Sins 2006 eit 't waeterschap oôk ze rissidensie in Middelburg. Industrieel leit 't achter bie Vlissienge, mae d'r is wel 'n industrieterrein: Arnestein. Ok is d'r een nieuw bedrieventerrein "Mortiere". Bie toeristen is 't vee in trek, deu 't istorische karakter van de binnestad. Sinds Paese 2008 is d'r 'n voebalmuseum in de stad, daer-a de geschiedenisse van 't Nederlandse voebal in uutgestald is.

Stadsbeêld[bewerk | brontekst bewerken]

Middelburg is nog dudelik 'n ouwe vestiengstad, mee 'n veste die vo 't groôste deêl nog lanks de ouwe bolwerken loôp. Alleên in 't zuudoôste is de veste verrinneweerd, deur 't in de negentiende eêuw gegraeve Kanaol deur Walchere. Middelburg eit betrekkelik vee monumente, daervan de Abdij mee d'n negetig meter oôgen toren, de Lange Jan, 't Vomaelig Staduus, de Kloveniersdoelen en de ouwe aeves de meês opvallende bin. Ok de Oôstkerke mag nie onvermolde bluve. Verders bin d'r 'n oôpe erenuzen. Rondom de Mart (waara het stikt van de duven) bin nae de Twidde Wereldoôrlog wè een antal nieuwe panden gebouwd, oewè het groôste deel van de verwoeste 'uuzen in ouwe stijl bin 'erbouwd. Buuten het stadscentrum is weinig 'oôgbouw te vinden, weerdeur het anzicht van de stad vanof het platteland van Walchern intact is gebleven.

Historie[bewerk | brontekst bewerken]

Middelburg wier in de vroege Middeleêuwen gesticht as burcht an 't riviertje de Arne, tusse Duun-burg (Domburg) en Zuud-burg (Soeburg). De burcht eit oengeveer op de plek van de Abdij gelegen, terwiel 't gebied van de Mart toen ok al beweund geweêst moe weze. Rond 1125 è ze de Adbij gesticht en in 1217 kreeg Middelburg stadsrechten van de graef van Olland. In de eêuwen daernae begon de stad te groeien door de vospoed die d'n andel over zeê brocht. Zoô kon in 1458 't Staduus gebouwd ore. 'n Ienkele bron liekt d'rop te wiezen dat de componist Jacobus Clemens non Papa (1510-1556) uut of bie Middelburg kwam, mae de anwieziengen daerom'eêne bin tegenstrieïg en ondujelijk.

In 1572, bie 't begin van d'n Tachtigjaerigen oorlog, sloôt de stad d'r eige nie bie d'n Opstand an, maer moch deu 'n beleg van de Waetergeuzen in 1574 toch capitulere. In de Rippebliek wier Middelburg nog belangrieker as andelsstad: zoôwel in de VOC as in de WIC aod 't 'n kaemer. Vanaf de achttiende eêuw goeng 't toch achteruut mee Middelburg, omad 't Sloe, d'n zeê-arm die-a Middelburg mee de zeê verboend, langzaeman dichtslibde. Daedeu verloor Middelburg z'n positie an Vlissienge, wat-a wel an zeê leit. In de 19e eêuw kreeg Middelburg een station an de Zeêuwse lijn.

In d'n Twidde Weareldoôrlog is de stad zwaer gebombardeerd deur de Duutsers in 1940 en in 1944 wier 't deu 't Britse bombardement op de Waschappelse Zeêdiek geïnundeerd. Nae d'n oorlog mochten vee gebouwe mee vee moeite weer ersteld ore. In 2004 trok 't gemeêntebestuur nae bekant 550 jaer uut 't staduus vo plekke te maeken vo de Roosevelt Academy, wat-a uut moe groeie toet de eerste Zeêuwse universiteit.

Topograofie[bewerk | brontekst bewerken]

Middelburg-topografie.jpg

Topograofisch kaertbeeld van Middelburg, 2010-2011. Klik op de koarte voe een vergroôting.

Zie ok[bewerk | brontekst bewerken]

Lienks naer buten[bewerk | brontekst bewerken]



 
Provincie Zeêland
Flag of Zeeland.svg
Gemeênten

Bossele | Goes | Kapelle | Middelburg* | Noord-Beveland | Reimerswaol | Schouwen-Duveland | Sluus | Terneuzen | Tole | Ulst | Ter Veere | Vlissienge

Waeterschappen
Zeêuwse Eilanden - Zeêuws-Vlaonderen
Belangrieke streken
Schouwen-Duveland - Noord-Beveland - Tole en Flupland - Walchren - Zuud-Beveland - Zeêuws-Vlaonderen
Nederland | Provincies | Gemeênten