Vlissienge

Liggienge van de gemeênte Vlissienge in Zeêland

De Sardientoren

Zeilschepen voor Vlissienge in de 17e eeuwe

Vlissienge (Nederlands: Vlissingen) is 'n Zeêuwse stad en gemeênte, die-a op Walchren leit, te zuden van Middelburg. Bie de gemeênte oren ok nog de durpen Oôst-Soeburg, West-Soeburg (wat-a vandaeg d'n dag meêr 'n stadswiek is) en Rittem. De gemeênte eit 'n oppervlak van 344,97 km², daevan 310,08 km² waeter is. Op 1 juni 2005 ao de gemeênte 45.236 inweuners. Vlissienge leit an 't end van de spoôrwegt uut Roosendaal, de Zeêuwse lijn en eit oôk nog 'n station Vlissienge-Soeburg.

Stadsfuncties

Vlissienge is vanouds geên bestierlik centrum, mae meêr 'n andelsstad. Vandaeg d'n dag nog eit 't 'n aeve (Vlissienge-Oôst), en 'n bescheie scheepsindustrie. 't Eit vedders 'n schoôlegemeênschap (Scheldemond) en 'n ziekenuus. Cultureel staet 't mee Middelburg op glieke voet: 't mist 'n concertzael maer ei wel 'n groôtere bioscoop.

Stadsbeêld

Deu 't bombardement van 1940 eit Vlissienge weineg monumente. De Jacobskerke uut de vuuftiende eêuw mee bescheie toren en intersant schip (mee afwiekende boôgen) is dae 'n vobild van; vedders is vee bebouwing van nae d'n Tweêden Wereldoolog. An 't Bellamypark staen nog 'n paor ouwe uzen en d'r is een ouwe waetertoren.

Geschiedenisse

De vroege geschiedenisse van Vlissienge is nie goed gedocumenteerd; dienkelik was 't in de Middeleêwen 'n vissersdurpje. Ok over de naem bin ze 't nie eêns. In 1315 kreeg 't stadsrechten, al zou 't nog 'n stuitje diere toet 't mee Middelburg kon concurrere. Die kans kreeg 't vanaf de zeventiende eêuw, toen-a de toegank nae Middelburg steês moeiliker wier en den aeve van Vlissienge daedeur antrekkeliker g'ore was veu schippers. Op 6 april 1572 sloôt Vlissienge z'n eige as derde stad in de Nederlanden bie d'n Opstand an.

In de negentiende eêuw kon 't z'n eige rillatief goed staende ouwe ongermeer deu de anleg vant Kanaol deu Walchren. In mei 1940 wier Vlissienge, mee Middelburg, zwaer gebombardeerd deu de Duutsers. In 1966 wiere de gemeênten Oôst- en West-Soeburg en Rittem an Vlissienge toegevoegd.

Op 22 november 2007 trad burgemeêster Anneke van Dok mee aolle wet'ouwers af nae aenleiienge van de groôte verliezen die-a geleje waeren bie 't bouwen van de wiek Scheldekwartier.

Bekende Vlissiengers

• Tofik Dibi, Nederlands-Marokkaonse politicus
• Maarten Ducrot, wielrenner
• Jean-Louis Pisuisse, cabaretier
• Michiel de Ruyter, admiraol
• Yvonne Wisse, atlete

Liest mee burgemeêsters

Ambtsperiode	Naam burgemeester	Partij of stroming	Bijzonderheden
1631 - 1650	Johan Cardon		Bewindhebber VOC kaemer van Zeêland
1654 - 1660	Cornelis Lampsins		Baron van Tobago
16?? - 1676	Daniel Cardon
17??-17??	Claude de Chuy		Overleden: 1774
17?? - 1795	Abraham van Doorn van der Boede
1815 - 1836	J.J. (Johan Jacob) Becker
1837 - 1848	Abraham van der Swalme
1849 - 1869	J.W. (Jacob Willem) Callenfels
1869 - 1879	H.P. (Henri Pierre) Winkelman
1879 - 1888	Arie Smit	Liberale Unie
1888 - 1897	H.P.J. (Henri Paul Jules) Tutein Nolthenius
1897 - 1919	Jhr. A.A. van Doorn van Koudekerke
1919 - 1943	C.A. (Carel Albert) van Woelderen
1943 - 1944	P.C. Callenfels	NSB
1944 - 1945	C.A. (Carel Albert) van Woelderen
1946 - 1967	Benjamin Kolff
1967 - 1972	D. (Derk) Roemers	PvdA
1972 - 1985	Th.J. (Theo) Westerhout	PvdA
1986 - 1999	J.C.Th. (Jaap) van der Doef	PvdA
1999 - 2007	A. (Anneke) van Dok-van Weele	PvdA
2007 - 2010	Drs. W.J.A. (Wim) Dijkstra
2010 - ....	Drs. R.H.(René) Roep	CDA

Trivia

• De New Yorkse wiek Flushing is nae Vlissienge genoemd.
• De tremliene tussen Middelburg en Vlissienge ha een Franse naem: Tramways à vapeur Flessingue-Middelbourg et extensions. Dit kwam deurdat de exploitaosie deu een Bels bedrief wier 'edae.
• De Zeêmanserve is een bekend hof'ie in Vlissienge.

Lienk nae buten

• Gemeênte Vlissienge