Westelijke Jordaonoever

De Westelijke Jordaonoever of Westoever (Araobisch: الضفة الغربية — ad-Diffah al-Garbiyyah, Hebreêuws: הגדה המערבית — HaGadáh HaMa'arávit, Iengels: West Bank) is 'n gebied in de streek Palestina. 't Leit t'n westen van de rivier de Jordaon en t'n noôrdwesten van de Dooie Zeê. 't Hrenst an Israël en Jordaonië en wier ok wel Cisjordaonië 'enoemd.

D'r weune ruum 3,9 meljoen mins'n (2022)^[1] op 'n landoppervlakte van 5660 km² ^[2]^[3] (iets groôter as drie mael de landoppervlakte van Zeêland), dat is bienae 700 inweuners per km². De meêste inweuners binne Araobieren (Palestijnen — 3.257.000 in 2023),^[2] de rest Joôden (Israëli's); ze weune in aparte Araobische en Joôdse plekken. De meêste Araobieren binne moslim, 'n paer percent is chrissen.

De Westoever was deêl van 't Mandaotgebied Palestina en is in 1948 deu Jordaonië veroverd. Tiedens de Zesdaegse Oôrlog in 1967 is 't deu Israël veroverd. Oôst-Jeruzalem leit ok op de Westoever en is (in 1980 nog eêns bie wet) vereênigd mie West-Jeruzalem en toe'evoegd an de staet Israël, de rest van de Westoever niet.

Op grond van d' Oslo-akkoorden II uut 1995 is de Westelijke Jordaonoever sins dat jaer verdeêld in 'n deu Israël bestierd deêl en 'n Palestijns deêl mie (beperkt) zelfbestier deu de Palestijnse Autoriteit. Deêze wil de heêle Westoever mie Oôst-Jeruzalem as 'oôdstad van Palestina (is noe Ramallah).

Israël noemt 't gebied (uutgezonderd Oôst-Jeruzalem) ok 't district Judea en Samaria mie de Joôdse plekke Ariël as 'oôdstad.

Belangrieke steê binne: