Flevoland

Provincie Flevoland

Vlagge Waepen
'Oôdstad	Lelystad
Commissaoris van de Konieng	Leen Verbeek (PvdA)
Belangriekste godsdienst(en)	protestant (25%), katteliek (12%)
Belangriekste streektaele(n)	Ollands, Urkers
Oppervlakte - Totaol - Land - Waeter	twaolfde 2.412 km² 1.412 km² 1001 km²
Inweuners - Totaol - Bevolkiengsdichteid	elfde 435.000 (2022) 308 inw./km²
Gemeênten	6
Volkslied	Waar wij steden doen verrijzen...
Officiële website	www.flevoland.nl

Sluusje bie Rutten

Flevoland is eên van de twaolf provincies van Nederland. Ze bestaet vo 't groôste deêl uut land dat-a in de twintigste eêuwe gewonne wier op de zeê en wier pas in 1986 opgericht. 'Oôdstad is Lelystad, awast is Almere vee groôter. Flevoland grens vol an Friesland en Overiessel en mee dieken an Gelderland, Utrecht en Noord-'Olland. Ten westen leit 't an 't Markermeer en 't Iesselmeer. Flevoland is uniek in de waereld, nergenst aors is zo'n oppervlak op zeê 'ewonne.

Geografie

Zoôas bove gezeid bestaet Flevoland naebie 'elemaele uut joenk polderland. Van noord nae zuud bin dat de Noôrdoôstpolder, Oôstelijk Flevoland en Zudelijk Flevoland. Binnen de bediekienge van de Noôrdoôstpolder leie tweê vroegere eilanden: Urk en Schokland. Gemiddeld leit d'eêle provincie 'n paer meter onder de zeespiegel.

't Groôste deêl van de provincie is bestemd vo landbouw. 'n Nie onbelangriek stik - vee meer dan ze oorspronkelijk bedoeld aodde - oor vandaeg d'n gebruukt vo bebouwienge, daerin overloôp vanuut de Randstad, voraol van Amsterdam, in kom weune. Vedders bin d'r ok natuurgebieden in de polder; 't bekendste en belangriekste bin de Oôstvaerdersplassen tussen Almere en Lelystad, 'n stik polder wat-a nie droôggevallen is omdat 't te diepe leit.

Geschiedenisse

In de negentiende eêuwe ontstoenge d'r vee plannen om de Zujerzeê, of stikken d'rvan, droôg te maeken. Dit wier zoôwè gedae om sturmvloeden te vokommen as om d'r nieuwe landbouwgrond bie te kriegen. In 1918 wier de Zujerzeêwet angenomme, daerin beslote wier 't plan van Cornelis Lely uut te voeren. De drie polders die-an Flevoland uutmaeke 'oorde daerbie. In 1942 kwam de Noôrdoôstpolder klaer. Oôstelijk en Zudelijk Flevoland volgde in 1957 resp. 1968. De tweê zujelijke polders, daer-a in 't begin nog vreêd weinig mensen weunde, wiere ondergebrocht in 't Openbaer Lichaem Zujelijke IJsselmeerpolders. De Noôrdoôstpolder 'oorde agauw bie Overijssel. As de polders meer beweund raekte wiere d'r gemeênten gemaekt vo de belangriekste plekken: Dronten (1972), Lelystad (1980), Almere (1984) en Zeêwolde (1984). Uutendelienge wier in 1986 't Openbaer Lichaem opgedoekt en wier de nieuwe provincie Flevoland gesticht uut Urk, de Noôrdoôstpolder en de Zujelijke IJsselmeerpolders.

De naem Flevoland wier gekoze nae Flevo, de naem van 'n meer of binnezeê in de Romeinsen tied dat/die zou uutgroeie toet de Zujerzeê. 'n Vroeg-middeleêuwse naem van datzelfde waeter, Almere, wier gebruukt vo eên van de steeën.

Politiek en bestier

Provincie

De Provinciaole Staeten in Flevoland è 41 zeêtels (vo 2015 waeren dat 'r 39 en vo 2007 43). De verdeêlienge is sins de verkieziengen van maert 2019 zoô:

Uutslag Staetenverkiezingen
Partij	2007	2011	2015	2019
FVD				8
VVD	9	9	7	6
PVV		6	6	4
GL	2	2	2	4
CDA	8	4	5	3
PvdA	7	6	3	3
CU	5	3	3	3
SP	6	3	5	2
50+		1	2	2
D66		3	4	2
PvdD	1	1	2	2
SGP	1	1	2	1
DENK				1
Zeêtels	39	39	41	41
Opkomst	43,9%	53,6%	45,6%	53,6%

't College van Gedeputeerde Staeten in 't tiedvak 2015-2019 steunt op 'n coalitie van CDA, VVD, SP en D66.

't College van Gedeputeerde Staeten in 't tiedvak 2019-2023 steunt op 'n coalitie van VVD, GL, CDA, PvdA, CU en D66.

Commissaoris van de Konieng is Leen Verbeek van de PvdA.

Gemeênten

Flevoland ei nie meer as zes gemeênten, mee vosproenk de minste van aolle provincies in Nederland. In de korte geschiedenisse van de provincie bin d'r ok noôit 'erindeêliengen gewist.

Almere Dronten Lelystad Noôrdoôstpolder (Noordoostpolder) Urk Zeêwolde (Zeewolde)

Waeterschappen

De provincie Flevoland vaol saeme mee 't Waeterschap Zujerzeêland.

Justitie

Flevoland ei gin eige rechtbank. De provincie maek deêl uut van 't arrondissement Zwolle-Lelystad, mee de rechtbank in Zwolle. Dit ressorteert onder 't 'Of van Arnem.

Cultuur

Flevoland bestae grof gezeid uut drie cultuurgebieden: Urk, 't nieuwe platteland en de steeën.

Godsdienst

Urk is eên van de meêst orthodox-christelijke durpen in Nederland. Zoô goed as iedereêne zit bie 'n kerkgenootschap - aollemaele protestants. Op 't nieuwe land bin de kerken, en zeker de orthodoxe, nie zoô over'eersend. In de steeën zitte vee butenlandse immigranten, die-a dikkels moslim of soms hindoe bin. 't Merendeel van de mensen is onkerkelijk.

Taele

Deu de joenge geschiedenisse oor d'r alleên op Urk 'n traditioneel dialect gepraot, maer dan wè wee deur 'eel de bevolkienge. Dit Urkers is 'n uniek dialect wat-a 'n bitje tussen 't 'Ollands en 't Nedersaksisch instaet. In Lelystad en Almere bin vee Amsterdammers gae weune, zoôda je dae vee Amsterdams oor. Op 't platteland spreke de ouwere boeren dikkels nog 't dialect van de streek daer ze vandaene komme, mae de middelbaeren en de joengeren praote d'r Algemeen Nederlands. In de polders van Flevoland oor volgens onderzoek zelfs 't "zuverste" Nederlands van 'eel 't land gesproke.

Lienks nae buten

• Provincie Flevoland
• Plaatsengids
• AlleCijfers

Provincie Flevoland (Nederland)

Gemeênten
Almere • Dronten • Lelystad • Noôrdoôstpolder • Urk • Zeêwolde

Waeterschappen
Zuujerzeêland

Streêken
Flevopolder • Noôrdelek Flevoland • Oôstelek Flevoland • Zuujelek Flevoland

---

Provincies
Drenthe • Flevoland • Friesland • Gelderland • Greunienge • Limburg •
Noord-Braebant • Noord-'Olland • Overiessel • Utrecht • Zeêland • Zuud-'Olland