Australië

Dit artikel is 'n etalageartikel.

Commonwealth of Australia
Vlagge Waepen
Baosisgegevens
Officiële landstaele:	Iengels
Oôdstad:	Canberra
Regeriengsvurm:	Federaotie, parlementaire constitusjonele monarchie
Staetsoôd:	Charles III
Regeriengsleider:	Anthony Albanese
Religie:	Christelijk 44%, niet-christelijk 10%, niet-relihieus 39%
Oppervlakte:	7.688.000 km² (1,8% waeter)
Inweuners:	27.194.000 (2024) (3,5 inw. / km²)
Aore gegevens
Volkslied:	Advance Australia Fair
Munte:	Austrâlische dollar (AUD)
UTC:	UTC+8 tot UTC+11 (zeumertied: per deêlstaet verschill'nd)
Nationaole feêstdag:	26 jannewari
Web | Code | Tel.	.au | AUS | +61

Kaerte

Kaerte

Sydney

Kanheroe

Koala

New South Wales

Northern Territory

Queensland

South Australia

Tasmania

Victoria

Western Australia

Indeêlieng

Indeêlieng mie eilan'n

Australië is een land in Oceanië en tevens een eige continent of ok we eiland dat a tussen de Hroôte Oceaon en de Indische Oceaon lig, ten wessen van Nieuw-Zeêland. Australië besli een oppervlak van 7,7 meljoen km² en ao 27 meljoen inweuners (2024).

Heografie

Australië hrens in 't noôrn an de Timorzeê, de Arafurazeê, de Holf van Carpentaria en Straet Torres, in 't oôssen an de Koraelzeê en de Tasmanzeê, wor zudelijk behrensd deur Straet Bass en de Hroôte Australische Bochte, en in 't zuden en wessen lig den Indischen Oceaon. De kustlijn besli 25.760 km.

Australië is 't hroste eiland en 't kleinste continent. Drievierde besti uut woestijn en vurral de provincie Queensland uut rehenwoud.

Vadder is Australië 't vlakste en laegste continent, wan de woestijn lig slechs even boven de zeêspiehel. De hroste vlakn zien de Centraole Laegvlakte en 't Westelijk Plateau. De bergkeetns lihhen in 't oôssen, wir a ok de oôgste berg, de Mount Kosciuszko (2228 m) lig.

In Australië lihhen ok ienkele riviern, ondanks 't droôhe klimaot, wivan an de Murray en de Darling 't belangriekste zien. Ok zien der verschill'nde meêrn, wironder 't Eyre-meêr. De woestijn'n in Australië zien:

• Gibsonwoestijn
• Hroôte Victoriawoestijn
• Hroôte Zandwoestijn
• Kleine Zandwoestijn
• Simpsonwoestijn
• Sturt Steênwoestijn
• Tanamiwoestijn
• Tirariwoestijn

Klimaot

't Middn van Australië ei een woestijnklimaot, wir a de temperatuur vreêt oôhe kan oploôpen en 's nachs varre kan daolen. Der val nog minder dan 250 mm neêrslag per jaer en 't droôhe seizoen duur langer dan 8 maen'n.

't Zuden van Queensland en 't noôrn van Nieuw-Zuud-Wales èn een subtropisch klimaot mie 't aele jaer deur werm weer, hroôte steedn as Perth en Sydney èn een mediterraon klimaot mie werme zeumers en zachte winters. In 't uterste noôrn eers een tropisch klimaot.

De deêlstaeten Victoria en Tasmanië èn een hemaotigd klimaot en in de winter kan 't vrie koud worn mie zelfs snieuwval. De rest van 't jaer is 't werm. In heheel Australië duur de lente van september tot november, de zeumer van december tot feberwari, de herfst van maerte tot meie en de winter van juni tot auhustus.

Flora en fauna

Bosbran'n maeken deêl uut van 't Australisch natuurlijk evenwicht. De blaeren van de eucalyptusboôm verteern naemelijk nie en de zaeddoôzen spriengen pas oopn bie hroôte hitte. De eblaekerde moederboôm overleef de brand deur uutloôpers. Droôgte en wind zurhen voe hroôtschaelihe bosbran'n.

In 't land komm'n vee unieke beêstensoôrten voe, wironder de kanheroes, de koala's, de wombats en aore klimbudelbeêsten.

Een biezondere zoogdiersoorte die ier voo komt bin de zogenaemde snaevelbeêsten.

Een opvall'nde veugelsoôrt is de thermometerveugel.

Hosdienst

Van de Australiërs die an een hosdienst anang'n, mik zòvee procent uut van de volhende hroepen (2021):

• chrissendom 44%
  • 20% katteliek
  • 18% protestants
    • 10% anglicaon'n
  • 2,1% oôsters-orthodox
  • 3,7% overig
• niet-christelijk 10%
  • islam 3,2%
  • hindoeïsme 2,7%
  • boeddhisme 2,4%
  • sikhs 0,8%
  • joôdendom 0,4%
  • overig 0,5%
• niet-relihieus 39%
• onbekend 7%

Heschiedenisse

De eêste inweuners van Australië, de Aboriginals, kwamm'n duzende jaeren eleen vanuut Azië ni Australië. In 150 n.Chr. wier voe 't eêst eschreven deur de Hrieken over 't onbekende land Terra Australis en in 1606 wier 't op de noôrdwestkust voe den eêste keêr anedaene deur een Europees schip, 't Nederlanse Duufken. 10 jaer laeter vaern een aore Nederlanse boôt ni de westkust en noemn 't Nieuw-'Olland. In 1642 vaern Abel Tasman ni Australië en ondekk'n dat 't een eiland was. Ok ondekkn die Tasmanië.

Strafkelonie

James Cook ontdekkn in 1768 den oôstkust van Australië en noemn 't Nieuw-Zuud-Wales. Iernae wier Australië een Iengelse strafkelonie voe hevangene wir an deze een eihen bestaen op mossen bouwen. Deze hevangene bouwen der kamp vanwehe 't droôhe klimaot nie in Nieuw-Zuud-Wales, mè een stikje ni 't noôrn, 't behun van de stad Sydney. De bouw van deze stad wier behonn'n op 26 juni 1788.

Uutmoôrdieng

De hevangene moôrn echter onderduzende Aboriginals uut en hroôte stikken land wiern van ulder eroofd. Ok hewone mensen hoengen ni Australië en den Iengelse reherieng haf de eêste tied hraotis stikken land wig, wat a nae heldprobleem'n hewoon wier verkocht.

Oôdstad

In 1901 wier Australië een dominion, een zelfstandig reheernd deêl van 't Britse waereldriek. Den oôdstad wier Melbourne, mè nae een priesvraeg tot 't ontwerp van de mooisen oôdstad, ewonn'n deur architect Walter Burley Griffin, wier dit Canberra.

Monarchie

Tiedens de Waereldoôrlohen vochen Australische troepn onder aore in Ehypte, Oceanië, Kreta en Ambon. Australië is sins tieden een constitusjonele monarchie mie as oôd de Britse konienk of konihinne; een rifferendum voe een rippebliek wier in 1999 ofewezen.

Politiek

Iedere Australische deêlstaet ei een eihen reherieng, rechterlijke macht, hrondwet en een overeid mie een eihen premier. Over 't aele land zien 't Australische Senaot en 't Australisch 'Uus van Afevaerdigden esteld, die an saemen 't Australische parlement vurmen.

't Australisch hemeênebest besti neffen de deêlstaeten ok uut 't Australisch Oôdstedelijk Territorium, 't Noôrdelijk Territorium, 't Jervis Bay Territorium, Christmaseiland, Norfolkeiland en de Heard- en McDonaldeilan'n.

't Staetsoôd van Australië is de Konienk van Australië Charles III. 't Staetsoôd wor in iedere deêlstaet vertehenwoordigd deur een houverneur en over de aele naotie deur een houverneur-generaol. In 1999 wier tiedens een rifferendum om over te haene ni een rippebliek dit voôrstel ofewezen.

Premiers

Premiers vanof 1975:

premier	partie	tied
Malcolm Fraser	Liberal	1975 - 1983
Bob Hawke	Labor	1983 - 1991
Paul Keating	Labor	1991 - 1996
John Howard	Liberal	1996 - 2007
Kevin Rudd	Labor	2007 - 2010
Julia Gillard	Labor	2010 - 2013
Kevin Rudd	Labor	2013 - 2013
Tony Abbott	Liberal	2013 - 2015
Malcolm Turnbull	Liberal	2015 - 2018
Scott Morrison	Liberal	2018 - 2022
Anthony Albanese	Labor	2022 - noe

Indeêlieng

Australië is een federaotie en wor inedeêld in zes staeten en twi (binn'nlandse) territoria.

hebied	indeêlieng	inweuners (2024)	oppervlak	inw./km²	'oôdstad
Australian Capital Territory (Austraolisch Oôdstedelijk Territorium)	territorium	474.000	2.358	200,9	Canberra
New South Wales (Nieuw-Zuud-Wales)	staet	8.479.000	801.000	10,6	Sydney
Northern Territory (Noôrdelijk Territorium)	territorium	255.000	1.348.000	0,2	Darwin
Queensland	staet	5.584.000	1.730.000	3,2	Brisbane
South Australia (Zuud-Australië)	staet	1.878.000	984.000	1,9	Adelaide
Tasmania (Tasmanië)	staet	575.000	68.000	8,5	Hobart
Victoria	staet	6.979.000	227.000	30,7	Melbourne
Western Australia (West-Australië)	staet	2.965.000	2.527.000	1,2	Perth
overige territoria
totael		27.194.000	7.688.000	3,5	Canberra

De federaole reherieng bestiert de Jervis Bay Territory, de Australian Antarctic Territory (claim) en de butenterritoria; dat binne de eilan'n:

• Ashmore and Cartier islands
• Christmas Island
• Cocos (Keeling) Islands
• Coral Sea Islands
• Heard Island and McDonald Islands
• Norfolk Island

D'r binne nog twi aore eilan'n:

• Lord Howe Island bestierd deu New South Wales
• Macquarie Island bestierd deu Tasmania

Lienks nae buten

• Landenweb
• Britannica
• World Factbook
• City Population
• AlleCijfers
• Klimaatinfo
• World Meteo. Org.
• Historiek
• Fact File