Flakkees

Uut Wikipedia
Hi nae: navigaotie, zoeken
Dit artikel zou eigenlik vertaeld moete ore nae 't Flakkees

't Flakkees is 't dialect van Flakkee, dus 't ôôstelijke deêl van 't eiland Goeree-Overflakkee, oftewè de gemeênten Menheerse, Dirksland en Oôstflakkee.

't Flakkees is 'n echt Zeêuws dialect. Dat bliek uut de klanken uu, ie en ae vò de Ollandse ui, ij en aa, uut diengen as voegwoôrdvervoegienge en uut de woordenschat. Verschillen mee 't zudelikere Zeêuws bin 't bestae van de h (huus inplekke van uus) en 't nie-wigvallen van de r vò 'n s (kers, nie kes). Die kernmerken deêlt 't mee 't Goerees. Belangriekste verschillen mee 't Goerees bin dan de werkwoorden gae, slae en stae klienke as in 't aore Zeêuws (en nie, zoôas in 't Goerees, as , slô, stô), da d'n tweêden infinitief op -en endegt in plekke van op -ene (ie oort deu te werken; Goerees werkene) en dat 't voltooid deêlwoord mee ge- begint en nie mee e-.

Je kunne 't Flakkees vedder verdeêle in 't Westflakkees, 't Oôstflakkees en 't Braebants-Flakkees. 't Braebants-Flakkees oor gesproke in Achtuzen en onder de katholieke beweuners van Ouwe Tonge, 't Oôstflakkees is te oren in De Plaete, D'n Bommel in bie de protestanten van Ouwe Tonge, 't Westflakkees in alle plekken van de gemeênten Menheerse in Dirksland. 't Braebants-Flakkees verschilt vòraol deudat in dat dialect de h weer wè wigvalt. Dit is inderdaod uut 't Braebants komme overwaoie. De verschillen tussen 't Oôst- en 't Westflakkees bestae vòraol uut kleine woordverschienselen. Binne de verschillende durpen in 't Westflakkese gebied bin ok weer kleine verschillen an te wiezen.

In dit tabelletje ore de verschille mee 't Goerees en binnen 't Flakkees onderlieng dudelik gemaekt:

Goerees Westflakkees Oôstflakkees Braebants-Flakkees
Hie staot in 't huus van z'n vriend Hie staet in 't huus van z'n vriend Hie staet in 't huus van z'n vrind Ie staet in 't uus van z'n vrind
Hie is in 't huus van z'n vriend ewist Hie is in 't huus van z'n vriend gewist Hie is in 't huus van z'n vrind gewist Ie is in 't uus van z'n vrind gewist

Nesso min as 't Goerees oor 't Flakkees bedreigd. D'r bin vee joengeren die-an 't praote, d'r is weineg immigraotie en toerisme, 't is nie verstedelikt en leit geïsoleerd.

Zie oak[bewerk | brontekst bewerken]

Lienk nae buten[bewerk | brontekst bewerken]