Aalsmeêr

Gemeente Aalsmeêr

Blommeveilieng

Aalsmeêr is 'n hemeênte in de provincie Noord-'Olland en op 1 jannewari 2008 weun'n der 26.569 inweuners. De hemeênte ei een oppervlakte van 34,40 km2, wivan 11,71 km2 waeter.

Heschiedenisse[bewerk | brontekst bewerken]

Aalsmeêr wor voe 't eêst enoemd in 1133 mie de naem 'Alsmar' in een oôrkonde hericht an den abdie van Riensburg. Indertied waeren der nog vee bossen en wier der vee turf ofestoken, zoda op een duur vee waeter ontstoeng en de mensen hiengen vissen. De hrond wier hebruukt voe onder are de teêlt van errebezems. In de 17e eêuw wiern ienkele meren droôhe eleid en wier de visserie minder en wier wee overeschaokeld op de tuunbouw, vurral den teêlt van errebezems.

Om de errebezems an de man te briengen, onstoengen eêste veiliengen behun de 20e eêuw. Toen a ondekt wier dan rozen 't hoed deen op de hrond in en rondom Aalsmeêr, wier de veilieng a hauw hebruukt om blommen te verkoôpen.

In de Twidde Waereldoôrlog wier Aalsmeêr een nist van de nazi's vanwehe zen stratehische lihhieng bie Schip'ol en den NSB-burhemeêster Kolb. Vanaf 1942 waren der verschill'nde joden in Aalsmeêr uut Amsterdam onderedoken.

In 1972 wiern de twi veiliengen van Aalsmeêr efuseêrd tot 1 hroôte veilieng, de Vereênigde Blommeveiliengen Aalsmeêr, die a dich bie Schip'ol lig. Deur deze hunstihe lihhieng qua infrastructuur ei de blommeveilieng een hoeie plekke veroverd op den Amerikaonsen en Japanse mart.

Aalsmeêr noe[bewerk | brontekst bewerken]

Aalsmeêr is bekend over den aele waereld vanwehe de blommenteêlt en de blommeveilieng, wat a de hroste blommeveilieng van den aele waereld is. De misten industrie is elehen an de Legmeerdijk, onder are worn der ok jachjes en verpakkiengsmateriaol eproduceerd.

Te bezichtihen zien onder are de Historische Tuun Aalsmeêr, een botaonische tuun over tuunbouw. Ok ka'j een rondvaert maek'n over de Westènder Plassen, wirin an vee eilandjes lihhen en vee an waetersport wor edaene. An deze Westènder Plassen lihhen ok vee kaoitjes en an de rand sti de waetertoôr'n van Aalsmeêr.

Eêst wier der ok aoltied een blommencorso ehouwen in Aalsmeêr, mè deurda de belangriekste sponsor, de blommeveilieng, der mie opieuw op 1 september 2007, wier de traditie ofebroken.