Peter Slager

Uut Wikipedia
Naar navigatie springen Naar zoeken springen
Peter Slager (2008)

Peter Slager (Dreister, 5 meie 1969) is 'n Zeêuwse zanger, liedjesschriever en instrumentalist. 'Ie is voraol bekend as basgitarist van Bløf, daer-at 'n ok de teksten vo schrieft.

Slager kreeg tuus de muziek mee van z'n broer Ronald, dien-a elektrisch urgel en 'oren speelt. In z'n joenge jaeren is Peter fan van Herman Brood, later van de Beatles (die d'n nie bewust ei meegemaekt). Awast fantaseerde d'n as tiener over 'n leven in de muziek, 'ie komt 'r pas laet toe om zelf te spelen. Op anraeden van Ad 'Padde' Braber, die in Zurrikzeê 'n muziekwienkeltje eit, gaet 'n basgitaor spele. Omdat 'n van z'n eige noga verlege is, leit 'm de rolle van bassist (op d'n achtergrond) wè.

Bløf in Emmen, 2006

Slager z'n carrière komt op gang as t'n Erik de Reus kenne leert, mee wien d'n in 't coverbandje Different Style speelt. Nie vee laeter richt 'n saeme mee De Reus, Cor Kok en Henk Tjoonk de band Gringo's Sweet Revenge op, wat laeter zonder Kok deugaet as Trouble Every Day. Omdat de band 'n nieuwe nodig ei, zet 'n 'n advertentie in de PZC. Daerop reageer Paskal Jakobsen uut Vlissienge. Slager moe in dien tied z'n andacht nog verdeêle tussen de muziek, zien studie 'Ollands in Utrecht en zien vriendinne in Goes. As t'n in Utrecht 'n liedje van The Scene 'oort, wil d'n rock op z'n 'Ollands gae maeke. Zo ontstaet in 1992 Bløf, mee buten Jakobsen, Slager en Tjoonk nog Bas Kennis, 'n kennisse van Paskal.

Sinds 1992 is Slager 'n constante factor in de bezettienge van de band. Ie schrieft de teksten, die Jakobsen dan wee op muziek zet. Pas in 2016 treedt 'n op de vogrond. Dat doet 'n naedat ok Jakobsen solo is gegae. Ie kies t'r vò om 'n plaete in 't Zeêuws te maeken, wat 'n anders as Jakobsen van 'uus uut praot. Zien debuutalbum Slik komt in november van dat jaer uut.