Rittem

Rittem (Nederlands: Ritthem) is 'n durpje in de gemeênte Vlissienge in de provincie Zeêland, mee naebie vuuf'onderd inweuners (530 in 2023). 't Leit kort an de 'Onte en d'n 'Aeve Vlissienge-Oôst. Rittem is juust as de meêste Walcherse durpen 'n kerkdurp; de kerke daer a 't om gaet is oorsproenkelijk veertiende-eêuws mee 'n schip uut de zestiende eêuwe. Kort bie Rittem leie ok 't Fort Rammekens en de groôste rioolwaeterzuveriengsinstallatie van Zeêland.

Geschiedenisse

Rittem oor vo 't eêste vermolde in 1235, as de plekke 'n eige parochie wier. Toet dan toe wier ze vanuut West-Soeburg bestierd. In dien tied laege noordelijk van Rittem 't durp en de 'eêrlijk'eid Nieuwerve en 't g'ucht Welzinge. Die wiere an 't begin van d'n Tachtigjaerigen Oôrlog deu 't geweld verwoest. De verwoestienge van de Rittemse kerke dwoeng de Rittemers toet 1612 in Oôst-Soeburg nae kerke te gaen. In dat jaer wier d'r in Rittem 'n 'Ervurmde Gemeênte gesticht. 't Ambt Rittem viel toe an de Vlissiengse fermielje Lambrechtsen, die-a d't toet 1849 rechten op ao. Toet 1 januaori 1966 was Rittem 'n aparte gemeênte, daenae viel 't an Vlissienge toe.