Oud Grifformeerde Gemeênte van Staevenisse

Uut Wikipedia
Naar navigatie springen Naar zoeken springen
De kerke in 2009.
De ingang van de kerke.

De Oud Grifformeerde Gemeênte van Staevenisse is een bevindelijk grifformeerde kerkelijke gemeênte in het Toolse durpje Staevenisse. De gemeênte 'eit tussen 800 en de 1000 leden.

De Afscheiding van 1834 kreeg in Staevenisse gin anang gevonden, 'oewel de Zeêuwse Vaoder der Afscheiding, ds. H.J. Budding wè op Tole voorging. Ok ds. P. van Dijke van Flupland preekte as oefenaer al in 1842 in Smerdiek. Naedat um predikant wier in 1851 schient um ok in Staevenisse te 'en gepreekt, weera in 1855 een "Ledeboeriaanse" gemeênte ontstong. In dat jaer kocht Marinus Luijk een 'uus dat um tot kerkje liet inrichten.

Nae de doôd van Ds. Bakker in 1885 wier de Oud Grifformeerde Gemeênte, zoas ulder zich noemende, een zelfstandige gemeênte. Aol die tied bleef het kerkje particulier bezit van ouwerling Luijk en nae z'n overliejen in 1869 dat van zijn weduwe, Maatje Heijboer. In 1905 verkocht 'ur het kerkje an de gemeênte. In 1906 wier Lin Potappel diaeken van de gemeênte, op 24-jaerige leeftied. Sins de gemnte zelfstandig was, kwamme doômenees as ds. B. Sterkenburg uut Alblasserdam, ds. N. Wedemeijer uut Den Haeg, ds. K. Werner uut Leiden, ds. P. van der Heijden uut Kampen, oefenaer J. Mijnsbergen uut Rotterdam en sins de twintiger jaeren ds. J. Fraanje uut Barneveld (van de Ger. Gem.).Op 9 dec. 1936 wier een nieuwe kerk deu ds. Fraanje in gebruuk genomen. Toe ds. Fraanje in 1948 was overleeje, kwam ok ds. B. Toes van de Oud-Geref. Gemeênte te Kinderdiek (toe ok nog een vrieje gemeênte) er preken. Jaerenlang was ouwerling Potappel de leidende fihuur in de gemeênte totdat um op 1 feberwari tiejens de waetersnoôdramp van 1953 verdronk. De aore ouwerling J. W. Slager nam toe de leiding over. In totael kwamme d'r uut de kerkelijke gemeênte 88 leden om het leven.

Op 30 jannewari 1962 sloot de gemeênte zich an bie het kerkverband, de Oud Grifformeerde Gemeênten in Nederland. Slager wier doômenee en op 23 feberwari 1962 deu Ds. J. van den Poel uut Ede as predikant in z'n eihe gemeênte bevestigd. In augustus 1965 vertrok Slager nae Rijssen. Drie jaer laeter kreeg de gemeênte weer een predikant in ds. J. van Prooijen, op 15 meie 1968 gekommen van Grafhorst. Op 15 augustus 1969 nam de gemeênte een orgel in gebruuk, angekocht van de Geref. Kerk te Nieuwerkerk an de IJssel. Tot die daotum wier de gemeêntezang nog aoltied ingezet deu een voorzanger. Voggens de ciefers van de Volkstelling van 1960 telde Oud Grifformeerde Gemeênte van Staevenisse in dat jaer 509 leden.

In 1979 komt doômenee Schinkelshoek nae Staevenisse. In 1981 overliejd deêze doômenee. Pas in 2004 komt er weer een doômenee, naemelijk ds. G. Gerritsen. Die vertrekt in 2008 weer nae Salford. In de tied van ds. Gerritsen wordt het kerkgebouw uutgebreid mee een antal vergaederzaelen. In 2011 neemt ds. T.L. Zwartbol een beroep an nae het durp. Zwartbol kwam uut Wekerom.

Externe verwieziengen[bewerk | brontekst bewerken]