Peking

Uut Wikipedia
Peking
Zicht op de Verboden Stad

Peking of Beijing is d'n oôdstad van China. D'r weune naebie 20 meljoen mênsen. De stad stong vroeher bekend as de Verboden Stad. Vee tempels van de ouwe Chinese keizers bin ier nog te bezichtigen. In 1989 wier ier een volksopstand bloedig neergesloge op het Plein van de 'Emelse Vrede. In 2008 'aelde Elisabeth Willeboordse ier brons op de Olympiese Spelen. Peking is een drukke stad die-a vee last eit van zogenaemde smog.

Stikje van 'Endrik over Peking[bewerk | brontekst bewerken]

Vuuf jaer elee waere de vrouwe in ikke in Peking. Dust nog vô dat de Olympische Spelen van 2008 dae behonne. Â je mit ’n bus van ‘t ’otèl naer ’n restaurant ree dee je dae meer as ’n ure over. Nie omdat Peking zô groôt is, mâ omdat ’t verkeer eêmae vast zat. In toe reeje d’r dien dag toch enkelt de auto’s mit ’n oneven nommer, want zô was de rehel. Aalken dag was ’t in de stad ’n bitje diezig: smog. Nie gezond, dust z’è toe vô de Spelen ’n stik of wat fabrieken stil’eleid. De inwoners aode dikkels ’n doekje vô ’t gezicht in om gezond te bluven zurgde zulder dat ze vee bewehieng krehe. Ons stienge eêl versteld te kieken, toe dat ons midden in de stad in ’n groôt park kwaeme. De inwoners zaalf waere dae nie om te kieken, mâ om wat te doen. D’r waere d’r vee mit riengen in ballen an ’t goôien. Aore lui kwaeme bie mekaore om les te kriehen op blokfluiten of om saeme as koor te ziengen. In d’r wier ok druk ‘edanst. Gin Chinese dansen mâ gewoon westerse, zô-as je die aalke maend ok in ’t durps’uus van Ouwerkaarke kan ‘oôre in uutvoere. Wulder vonde dat eêl goed in zaehe ok dat ‘r gin eêne Chinees ’n dikken buuk ao. Die zie je ier juust eêl vee! Mâ noe zag ik in de krante ’n foto van ’t strand bie Bresjes, waer of maansen mit stokken stienge te zwaoien. Wushu stieng d’r bie. In jao ô, je kan noe ok in Zeêland doe wat wulder in Peking zaehe: Wushu, Tai Chi of Qigong. Of’ekeke van de Chinezen. Gae ’t ok doe, maansen, over ’n paer jaer is t’r gin Zeêuw mî mit ’n poke van ier tot gunter. Dat lillijke woord poke mag ik van de vrouwe nie gebruke, dust ik mot noe gauw op’ouwe mit dit stikje. De vrouwe is ’n stok an ’t zoeken, nie vô Wushu, mâ om mien achterop te kommen. As t’r over twî weken gin stikje van mien in de krante staet weet je waer of ’t an leit.

Externe verwieziengen[bewerk | brontekst bewerken]