Marianne Thieme
Marianne Thieme (Ede, 6 maerte 1972) was de (eêste) voorvrouwe van de Partij vô de Dieren, van 2002 toet 2019 was zie politiek leider.
In 2006 wier zie saemen mie Esther Ouwehand lid van de Twidde Kaemer. Toet 2019 was zie lid en ok fraoctieveuzitter.
Thieme is vegaoniest en lid van de Zevende-daegs Adventiesten.
Stikje in PZC
[bewerk | brontekst bewerken]Ongerstoônd stikje over Marianne Thieme verscheen op 26 juni 2010 in de PZC. Ooit verzuchtte d'r es iemand: "Oe langer a'k mee mensen werreke, oe meer a'k van dieren ouwe". Di zit best wat in en het za Marianne Thieme as muziek in d'r oren klinke.
Me moete 't natuurlijk ook wi nie overdrieve en de anleg van de kustwering uutstelle vô een veugelnist!
Mè goed, de meêste mensen ebbe wè wat mee dieren. Onden, katten en paerden dienk ik, dat de meêst geliefde dieren bin. En 'trouw' en 'vriendschap' zulle bie de meêsten as belangriek ervaeren ore. Zet di dan het woordje 'onvorwaerdelijk' nog vô en dan behriep je da dieren dikkels licht in 't voordeêl bin ten opzichte van de mensen !
As kind ebb'ik ook een ond haod, mè die ao ADHD.., hloof ik! Die blafte voral te onpas en di verhroôtte'n het weungenot van de buren nie mee! Dirom moest'n nè rustiger oorden, tot mien hrôte verdriet! Laeter ei een katte ons gekôze as 'dienaer', wan van een katte bin jie nooit 'de baos'. Dat is die katte zelf.
Op de Partij vô de Dieren za'k nie stemme, wan ik dienke wè es dat het wat 'deuslaet'. De leste tied zie'k, as ik ardlope over de kunsthostennisbaenen bie ons op 't durp, nôha es een lange wurm, die, zonder resultaât, probeert de grond in te duken. Dan dienk' ik aoltied an Marianne, de hroôtste dierenvriendin van Nederland. Zou die noe die wurm oppakke en nè de 'volle' grond brienge? Zou ze kaemervraehen stelle over het dieronvriendelijke kunsthos?
Ik laete die wurm aeltied doe, a probeer ik er nie op te trappen. Wat bezielt zô'n beêst toch om eêl die tennisbaene over te wille steken? Nog een geluk dat 'n nie op 't kunsthos van een hockeyveld is verdwaeld !
Mooi is't ook om te zien oe of huus mee dieren omhae. Vô ulder bin een ond en/of een katte speelkammeraodjes. Je kan d'r van aoles mee onderneme en z'ore nie vlug kwaed ! Noe bin huus ook a eêl gelukkig mee een naemaekdier. Di ore ze eigenlijk naebie mee hroôt gebrocht. De knuffelberen en dito -onden, -katten en -olifanten bin vô vee huus onmisbaer bie 't opgroeien. En meêstal ebbe ze één lievelingsdier as knuffel bie dag en nacht, in goeie en kwaeie uren, tuus en overal wi ze komme. Ouwers kunne gerust nè ruus as de 'kokkel' vergeten is. En z'ore lang gebruukt .! Ik kenne zô'n beêst, da a ooit een beertje was, mè noe een nie bestaend dier is hore mee oren van een knien en ledemaeten van een ond. Mè d'eigenaer is t'r nog zô an gehecht, dat de nacht nie kan beginne zonder z'n 'dier'. En andoenlijk is ook het verhaâltje van dat meisje van viere. Zie ei een muus gekrege, een muus van meer dan twintig centimeter lang. Het is d'r steun en toeverlaet. Mè deu 't gebruuk oordt de conditie van 't beêst nie beter. Ie oordt wè es nat, en zeker wè es vies. En dan moet 'n gewassen ore. De muus oordt, op straffe van vee geblèr, alleên in de wasmachine gestoke. De 'bâzin' zet d'r eihen vô 't apperaât en kiekt deu 't venstertje zonder opouwen nè d'r lieveling, die een êle stuit lei te 'rollebollen' op dertig grâden. Z'is t'r nie bie weg te slaen en af en toe zwaâi ze nè d'r muus, todat 'n schoôn is! 'Onvorwaerdelijke' trouw an een dier, deu een mens(je). Dat bestaet ook..!
Lienks nae buten
[bewerk | brontekst bewerken]- Parlement.com
- Biograofie Marianne Thieme, Partij vò de Dieren