Striekiezder

'n striekiezer

’N striekiezder, striekiez’r of striekbout is ’n uushouwelijk gerief dat ebruukt wordt om textiel deur warmte en eventueel stoôm glad te strieken nao ’t drogen. Strieken is nie alleen voe dat de goed d’r mooi uutzie, mae ’t is ok goed voe de hygiëne, deurdat bacteriën deur de hitte doôdhaen. Dat is bievoorbeeld nuttig voe zakdoeken, scheuteldoeken en handdoeken.

’t Woord iezder/iez’r verwies nae de eeste striekbouten, die van iezer gemaekt wier. Die wier bievoorbeeld op ’n kachel heet gemaekt en moesten d’r warmte zo lange meugelijk vas’ouwe. Daêrom wier d’r vee iezder gebruukt, waedeur ze zwaer wazze. Later wier ’t elektrische striekiezder uutgevonde, waerin ’n gloeidraed de warmte in d' onderkant opwekt. ’t Grote veurdeel was dat ’t vee minder zwaer was en dat de temperatuur mie ’n thermostaat in te stelle was.