Zurrikzeê

Liggienge van Zurrikzeê in de gemeênte Schouwen-Duveland

Blik over Zurrikzeê

Het Gravensteên.

Spaans beleg in 1575

Zurrikzeê in 1649

Zuudhavenpoort

Zurrikzeê (Ollands: Zierikzee) is 'n stad in d'n gemeênte Schouwen-Duveland, waer-at 't de oôdplekke van is. In 1248 kreeg 't stadsrech'n. 't ao op 1 jannewari 2007 10.570 inweuners, daervan d'r 5064 venters waere en 5443 vrouwen. De inweuners van Zurrikzeê stae bekend as Stoepeschieters.

Zurrikzeê heit een rieke geschiedenis. Blikvanger is de Dikke Toren ofwè de Sint Lievensmonstertoren. D'n toren is 62 meter 'oôge. De bouw van de toren begon in 1454. Ontwerper was de Mechelse bouwmeêster Andries Keldermans en het zou de oôgsen van Nederland motte worre, mar deu geldhebrek is um nooit of'emikt. Vadder heit de stad nog drie intacte stadspoorten, da komt weinig voo in Nederland. Ok ut stad'uus is een prachtig monument. Zurrikzeê heit een haevene an de Oôsterschelde weer nog een antal mosselschepen ligge. Tehenwoôrdig is ut een toeristische stad 'eworren naedat ut een antal eeuwen in'eslape was. Deerdeur binne wel vee monumenten 'espaerd ebleve.

Stikje over de politiek in de stad deu Endrik

Endrik is een schriever uut Renisse die nogal es over de Schouwse politiek schrieft in lokaole krant'n. Ier ei'j zo'n stikje: Ze bin in Zurrikzeê agheêl nie tevree over de plannen van de gemeênte om ’t aevenpark te veranderen. Eihenlijk mot ik ’t aevenplein d’r bie noeme, want dae bin ze ’t nie seêns over de vraehe of t’r noe wè of nie auto’s mahhe komme. Dat ei ’t college noe gelokkig beslote, mâ ze gae nie varre genocht. Want z’aode glieke motte beslute om ’n soort golfwaehentjes, mâ dan ’n slagje groôter, te laete riejen, die of wè dae mahhe komme. Dan kâ je van de parkeergelehen’eid overstappe op zô’n waehentje in je nae ’t aevenplein laete rieje. In dan is t’r glieke ok wî waark vô bepaelde ondernemers die dat wille oppakke.
 De meêste maansen die of an ’t aevenpark wone wille ’t liefste dat ’t bluuft zô-as ’t noe is. Mâ de gemeênte wil de loap van de Oôsterschelde laete zie, of van de vroehere kreken, dat weet ik nie zô percies, in d’r dust ’n kronkelpad in maeke. Nie dat ‘r ok mâ eêne zâ weze die of dat zâ zie, mâ ’t gaet om ’t geweldihe idee d’r achter. Jao beste stoepeschieters, dat ao je netuurlijk allank â kunne wete. Ze dienke bie de gemeênte enkelt mâ van bovenof. De ellende is â behonne toe dat ’t gemeênt’uus gebouwd wier. Want dat mô je ok vanuut ’n vliegtuug zie, dan ei je ’t eênigste moôie zicht. Â je d’r vô staet zie je enkelt ’n groôt gries gebouw vol mit deuken. Ik è ’t daerom wè ’s ons pokken’uus genoemd. Mâ â je van bovenof d’r op kiekt, in dat ei Endrik ok ’s edae, zie je dat ’t uut aomè ouwerjaerse striekiezders bestaet. De ellende wier nog groôter toe dat ’t college van B. en W. besloot om zaalf op de oagste verdiepieng te gae zitten. Dust burhemeêster in wet’ouwers bekieke aole Schouwse zaeken….juust…van bovenof. In zô kâ je dan op ’t idee komme om ’n krekenpatroôn op ’t aevenpark te maeken. ’t Is ’n kronkel in ulder ‘oôd waer of ze niks an kunne doe. Of ze motte ofdaele nae de behaene grond in dat zie ik ze nog nie trek doe.

Eboor'n in Zurrikzeê

• Pieter Caland (1826-1902), waeterbouwkundige (ontwerper Nieuwe Waeterwegt)
• Wim van den Doel (1962), oôgleraar geschiedenis
• Marcel Dost (1969), meerkamper
• Hendrik Albert van IJsselsteyn (1860-1941), ambtenaer en minister
• Johannes Cornelis de Jonge (1793-1853), politicus, archivaoris en geschiedschriever
• Marinus Willem de Jonge van Campensnieuwland (1786-1858), advocaot, rechter en minister
• Carel Joseph van Kempen (1872-1955), ambtenaer en politicus
• Adrie Koster (1954), voetballer en voebaltrainer
• Abraham Johannes Muste (1885-1967), Amerikaons predikant en pacifist
• Dolf Roks (1962), voebaltrainer
• Willem Teellinck (1579-1629), dômenee en theoloog
• Peter van Vossen (1968), voeballer en voebaltrainer

Zie ok

• Zuudhaevenpoorte
• Noordhaevenpoorte
• Nobelpoorte
• Veêrdienste van Zurrikzeê nae Kats

Lienklieste

Commons

Wikimedia Commons

Kiek vò meêr plaetjes over dit onderwerp in de categorie Zurrikzeê van Wikimedia Commons.

Zeêuwse steden

Steden, meê een stem in de Staeten van Zeêland: Hoes · Middelburg · Reimerswaol (tot 1587) · Ter Veere (nae 1574) · Vlissienge (nae 1574) · Tole · Zurrikzeê Smalsteden (gin stem in de Staeten van Zeêland): Brouwes'aeven · Domburg · Erremu · Kortjeen · Smerdiek · Waschappel Steden in Zeêuws-Vlaonderen (buuten het vroegere gewest Zeêland): Aksel · Biervliet · Erreburg · Filepine · Iezendieke · Sas · Sint Anna ter Mu · Sluus · Terneuzen · 'Ulst · Wosburg