Witbrauwliesterhaoie

Uut Wikipedia
Witbrauwliesterhaoie
IUCN-status: Veilig
Witbrauwliesterhaoie
Witbrauwliesterhaoie
Taxonomische indeêlienge
Riek: Beêsten (Animalia)
Stamme: Chordabeêsten (Chordata)
Klasse: Veugels (Aves}
Orde: Zangveugels (Passeriformes)
Femielje: Timaliidae
Heslacht: Garrulax
Soôrt
Garrulax canorus
(Linnaeus, 1758)

De witbrauwliesterhaoie (Garrulax canorus), in 't Chinees hwamei, is een zangveugel die a deêl uut mik van de femielje van de timalia's (Timaliidae) en 't heslacht van de liesterhaoien (Garrulax). Van oôrsprong leef de veugel in China, Vietnam en Laos.

Uterlijk[bewerk | brontekst bewerken]

Zowè de Chinese naem (画眉, huà-méi), die a heschilderde wenksbrauwe beteêken, as de Nederlanse naem duden op de helderwitte wenkbrauwstrepe van de veugel die a sterk contrastreer mie 't roôdbrune veêrnkleêd van de veugel. De witbrauwliesterhaoie wor 21 toet 25 cm lange en ei breêë, aferonde vleuhels. Neffen zen roôdbrune veêrnkleêd ei 't een doenkere vlekken op zen rik, kop en kele. Zen snaevel en zen poôten zien heêlachtig.

't Verschil mie de ondersoôrte owstoni van Hainan is da de lessen bleêker en op zen rik meêr oliefhroen is. De Taiwanesen ondersoôrt taewanus is hriezer, meêr hestreept en missen de witte rienge rond der oôhen die a de Chinese vurm wer ei.

Zang[bewerk | brontekst bewerken]

De witbrauwliesterhaoie ei een lude, afwisselnde zang die a ard en dudelijk is en vee naebootsiengen van aore veugels bevat. Ze roepn bie een rasp'nde fluite of riedel. Vanwehe der mooie zang worn ze vee ehouwen in kooien en op sommihe marten in China zitt'n der onderde van deze veugels.

In sommihe parken zien der ok speciaole hwamei-'oekjes wir an eihenaers der veugel ni toe kunn'n briengen zodan de veugels mooier ziengen wunnir an ze onder soôrthenoten zien. Soms worn der ok zangwedstrijden bie ehouwen.

Verspreidieng[bewerk | brontekst bewerken]

De witbrauwliesterhaoie kom oôrsproenkelijk voe in China, Vietnam en Laos. Der zien drie ondersoôrten, wivan a de ondersoôrt G.c.canorus voekom van centraol China toet Noôrd-Laos en Midd'n-Vietnam, den ondersoôrt G.c.owstoni op Hainan en den ondersoôrt G.c.taewanus op Taiwan. De G.c.canorus is ok eïntroduceerd op Taiwan, Singapore en Hawaii.

Habitat[bewerk | brontekst bewerken]

De witbrauwliesterhaoie leef vurral in hrassig land, park'n en tunen tot een oôgte van 1800 meter boven zeêniveau. Ze vin'n der eetn tussen de blaeren op de hrond en zien vrie schoef en dan ok moeilijk te ziene. Mistal leven ze in paertjes of kleine hroepen.

De veugels broeien van meie tot juli en bouwen een komvurmig nist tot twi meter boven de hrond in een boôm of een struke. Ok wor 't nist wès op de hrond ebouw. Der worn twi tot vuuf blauwhroene eiers eleid.