Cornelis van Aerssen van Sommelsdijck

Cornelis van Aerssen van Sommelsdijck (ca.1680)

Fort Zeelandia

Cornelis van Aerssen, 'eer van Sommerdieck, Bommel, De Plaete, Spijck, (D'n Aegt, 20 auhustus 1637 - Paramaribo, 19 juli 1688) was een voormaelig kolonel der cavaolerie. Um was gouverneur van Surinaome van 28 november 1683 toet de dag weerop um wier vermoord. Van Aerssen was gelieerd an de markies van Saint André Montbrun, elegen an de voet van de Mont Ventoux, via z'n vrouwe, de dochter van een roemruchte Franse militair, Alexander du Puy.

Persoônlijk

Cornelis trouwde te Paries op 1 juni 1664 mee Marguérite du Puy markiezin van St. André Montbrun. Ur stamde uut een protestantse femilie, ofkomstig uut Montbrun-les-Bains in de Dauphiné. Ze was de dochter van Alexander du Puy, markies van St. André Montbrun (1600-1673) en van Louise Madeleine de la Fin Salin, vrouwe van la Nocle (1609-1693).

Uut het 'uwelijk van Cornelis en Marguérite bin de volgende kinders eboren:

• Alexander van Aerssen heer van Sommelsdijk en Spijck (1668-1696).
• François van Aerssen heer van Châtillon en nae de doôd van um z'n broer Alexander in 1696 eer van Sommelsdijk, de Plaat, Bommel en Spijck
• Henriette Lucretia van Aerssen, 'eboren in D'n Aeg op 9 oktober 1678, hing in december 1700 in ongertrouw te Deventer en trouwende op 6 feberwari 1701 in D'n Aeg mee Vincent Gédéon de Henry markies van Cheusses eboren in La Rochelle rond 1664. Ie was luitenant-kolonel in Deense dienst en de zeune van Jacques de Henry de Cheusses en Renee de Lauzerée.

Surinaome

Cornelis van Aerssen kocht op 21 meie 1683 voor 86.666 gulden, een derde deel in de Sociëteit van Surinaome. Um liet z'n eihe deu de aore deelhebbers - de West-Indische Compagnie en de stad Amsterdam - tot onbezoldigd gouverneur van Surinaome verkiezen. Cornelis scheepte z'n eihe op 3 september 1683 in op Texel en kwam op 24 november 1683 te Paramaribo aan. D'r weunden in die jaoren onheveer 1.200 blanken in Surinaome en in Paramaribo stonge nie meer as zestig uuzen. Van Aerssen stellende voo een Politycke Raed in te stellen van acht in plekke van tien kolonis'n en raekte al snel in conflict mee de raed. As Calvinist proberende um de zondagsrust in te voerene, mar kreeg kritiek van zowe de Joodse plantage-eigenaoren as vanuut Amsterdam. Toch eit um ok vee goeds edae voo de kolonie.

Op 19 juli 1688 wor um vermoord as muitende soldaoten meer held eise. Cornelis van Aerssen wier in 1689 begraeven in Sommerdiek.

Externe verwieziengen

• Wolbers over Van Aerssen van Sommelsdijck
• Nationaal Archief over de eerste predikanten in Suriname
• VIP's uit Suriname
• Robert Fruin over Cornelis van Aerssen

Bronn'n

• Knevel, P. (2001) Het Haagse Bureau: 17de-eeuwse ambtenaren tussen staatsbelang en eigenbelang.
• Meiden, G.W. van der (1986) Betwist bestuur. Een eeuw strijd om de macht in Suriname (1651-1753).
• Slot, E. (1990) Vijf gulden eeuwen. Momenten uit 500 jaar gemeentefinanciën.
• Oosthoek's Encyclopaedie (1917)
• Achtenveertig brieven door C. van Aerssen vanuit Suriname. In: De West-Indische Gids 1923-1926